Më 4 – 23 prill zhvillohet në “Tirana Ring Center” panairi “Festat e Librit”, organizuar nga libraria më e re në Tiranë: Librat e rinj, ofertat që arrijnë deri në -50%, takime me autorët, rekomandime dhe shumë surpriza të tjera i presin lexuesit e të gjithë grup-moshave….

Libri ka gjithnjë e më pak prani fizike në jetën përreth nesh, por kur syri bie në kontakt me këtë objekt magjik, i jepet pa kusht dhe zhytet brenda fletëve të tij. Përditshmëria dhe bota virtuale na hutojnë me një shumëllojshmëri gjërash dhe mundësish për tu argëtuar dhe për të konsumuar kohën tonë. Por, tashmë është e provuar se përmes leximit ne marrim jo thjeshtë njohuri, por përjetojmë edhe një terapi mendore me vlera të jashtëzakonshme, dhe përmes tij ne përftojmë një anti-dot ndaj harresës individuale dhe kolektive.

Pikërisht, për këtë arsye, nëse duam ta kemi librin pranë nesh dhe duam të përfitojmë të mirat e tij, – ne duhet t’i japin vendin në të gjitha hapësirat ku jetojmë dhe punojmë, – ku blejmë dhe argetohemi. Për këtë qëllim, libraria më e re në Shqipëri, “Leximtari”, dhe qendra tregtare “Ring” do të vijnë me një panair të përbashkët këto ditë, të quajtur “Festat e Librit”, i cili do të zhvillohet gjatë muajit prill.

Dhe, ku ka muaj më të bukur dhe më domethënës sesa prilli për të festuar me libra dhe autorë: Ne kemi Ditën Botërore të Librit për Fëmijë më 2 prill, në përkujtimi të përrallëtarit të madh Hans Kristian Andersen dhe Ditën Botërore të Librit më 23 prill, në nderim të kolosëve të mëdhenj të letërsisë botërore, Uilliam Shekspir dhe Servantes!

Në periudhën 4 – 23 prill “Festat e Librit” do të mirëpresë në hyrjen kryesore të “Tirana Ring Center” lexues të të gjithë grup-moshave; të gjithë ata që janë në kërkim të librave më të mirë në gjuhën shqipe; për ata lexues që duan të dijnë se cilët janë librat e rinj.

Stafi ynë, nën drejtimin e bashkëthemeluesit të “Leximtarit”, Dr. Albert Gjoka do të jenë të shërbim të të gjithë të interesuarve për të marrë rekomandime dhe për të bërë përzgjedhje goditëse librash që i japin fantazi dhe motiv jetës tonë. Pas një përvoje të gjatë në organizimin e eventeve të tilla, ai do të koordinojë të gjithë aktivitetet e festave të librit dhe do të ndajë rekomandime përzgjedhëse për vizitorët e shumtë në këtë qendër.

“Festat e Librit” do të kenë edhe oferta fantastike, të cilat shkojnë deri në -50%. Për këtë arsye, “Leximtari” u është mirënjohës të gjitha enteve botuese që e kanë mbështetur këtë panair, i cili synon që të krijojë traditën e tij në mjediset e “Tirana Ring Center”. Përgjatë gjithë këtyre ditëve ne do të kemi të ftuar edhe autorë të njohur të letërsisë për fëmijë, të cilët do të flasin me lexuesit e vegjël, do të lexojnë dhe do të bëjnë aktivitete zbavitëse.

“Leximtari” ka përzgjedhur me shumë kujdes një listë me libra sipas kategorive dhe zhanreve, me synimin për të përmbushur nevojat mendore dhe shpirtërore, duke nisur që nga librat e parë për fëmijët e porsalindur, librat e kopshtit dhe shkollës, enciklopeditë, përralla, aventura dhe fantazi, për të ardhur tek fenomenet më të fundit të librave bestseller, të quajtur book-toks, ku tashmë kemi edhe autorët shqiptarë, të tillë si Aulona Ilasllari, Klenti Hodo, Dëfrim Ceka, etj.. Po ashtu, kemi bërë një përzgjedhje të kujdesshme të romancave, sagave dhe thrillerave më të mirë që janë botuar gjatë viteve të fundit nga botuesit shqiptarë.

Ne kemi menduar edhe për ata që ndodhen larg Tiranës, të cilët mund të marrin librat që duan përmes rrjeteve tona sociale dhe faqes së internetit Leximtari.al.

Për të gjithë ata që duan të zhvillohen dhe ta kenë librin si pjesë të pandashme në rritjen personale dhe profesionale, kemi përzgjedhur botime cilësore të librave të motivimit, shitjes, marketingut, menaxhimit, si dhe biografi apo libra historikë, të cilët kanë domethënie edhe për kohën që po jetojmë.     

“Leximtari” vjen me misionin e qartë për t’iu ardhur në ndihmë të gjithë individëve që duan të rriten përmes librit. “Festat e Librit” organizohet për herë të parë në Ring Center, e cila këtë periudhë feston 10-vjetorin e krijimit të saj edhe me një ngjarje të bukur librore për vizitorët e saj të shumtë. Duke nisur që nga data 24 prill brenda “Tirana Ring Center” do të kemi edhe librarinë, duke kontribuar në këtë mënyrë që vizitorët e shumtë të bëhen pjesë e bashkësisë së leximtarëve.