Pal Ndrecaj
POEZIA
Gjithçka ish’ zhytur në një prehje
të thellë
të rëndë mbytëse
Preheshin njerëzit bimët
ajri uji
akrepa busulla
Preheshin ngjyrat ndjesitë
foljet që u jepnin kuptime
Sende emra ngjarje
koha zhytur në prehje
Derisa një zog shpërthen
përmes plasaritjes së lëvozhgës së një emocioni
që s’përmbahet ma
dhe del e merr dynjanë
Pastaj krejt nisin me lëvizë përsëri…
BINARËT
A e ke vënë re si u zgjatën ata deri këtu
si u shkëpusnin trenat shkëndija me masë
ndonjë këngë nga njëri skaj do të jetë dëgju’
dhe në tjetrin ndonjë sorrë do ketë lëshuar një glasë
Tash imagjino se ti je binarët
që përthekojnë botën në të dyja skajet
dhe lexoje këtë si një ide të qartë
si bashkëjetojnë gëzimet dhe vajet
Kështu mes fitoresh e humbjesh
udha jote mbërrin në fund
në mbarim të betejës së pasosur
të dy flamujt njëlloj tund
YJET
Brenda mbështjellësit të madh të territ
ata janë dëshmia se ai mundet me u shpërthy’
janë rasti me të provoku’ mu tani
dhe me të ba me mendu’ se edhe ti je si ata
i mbështjellë me terrin tënd
dhe me të futë në konfliktin e madh
që betejat i zhvillon në zemër
me të ba dëshminë e te gjitha rivaliteteve
të atyre që shkojnë deri në fund dhe të atyre që thyhen
Kjo njësoj mbron arsyen për të cilën je
nëse i thyeri nuk është ai i munduri që fle
po ai që ringritet
edhe njëherë
I sheh yjet?
ata nuk tërhiqen
Pal Ndrecaj ka lindur më 1960 në fshatin Moglicë të Gjakovës. Ka mbaruar studimet në Degën e Letërsisë dhe Gjuhës Shqipe në Universitetin e Prishtinës. Ka punuar si mësimdhënës dhe gazetar më Kosovë.
Ka botuar: “Lule mbi plagë”, poezi, Rilindja, Prishtinë 1993; “Akti i krijimit”, poezi, “Rilindja”, 1998; “Lista e zezë”, roman, Gjakovë 2010. Ky roman ribotohet në Prishtinë nga “OM” më 2019. “Gdhendja e përmasave”, poezi, New York 2015. Këtë vit do të dalë edhe vëllimi i katërt poetik në Prishtinë.
Jeton ne SHBA prej vitit 2004.
Është drejtues i faqes në internet “Poezi elitare”
NO COMMENT