William Carlos Williams

PARABOLA E TË VERBËRIT

Kjo pikturë e tmerrshme por e mrekullueshme

parabola e të verbrit

s’ka ngjyrë të kuqe

në tërësinë e saj shfaqet një tufë

lypsash që ecin njëri pas tjetrit

nga majtas lart për djathtas poshtë

tërthor tabllosë

duke hequr këmbët zvarrë

në moçalishte përfundojnë

në të gjithë pikturën

fillim e mbarim

as në sfond s’duket frymë e gjallë

veç ca fytyra të parruara

prej të varfërish

e zhelet e tyre

një pellg për të larë teshat

ca kasolle fshati

kambanarja me majuce e kishës

fytyrat ngritur lart

si kthyer nga drita

dhe asnjë hollësi e tepërt

në të gjithë tabllonë njëri ndjek

shkopin e tjetrit me shkopin e vet

në dorë fitimtar drejt fatkeqësisë

SHIU

Ashtu sikur bie shi

bën edhe ti

me dashurinë tënde

gjithçka të zbuluar

lag kudo

Në shtëpitë

krejt të terura

dhomat

e dashurisë së paligjshme

ku jetojmë

dëgjohet rrebeshi

i shiut

Atje

pikturat

metalet e çmuar,

stofrat e shtrenjtë

harbimi ynë

i kënaqur

kundron

nga dritaret

rrebeshin pranveror

të dashurisë tënde

rënien

e shiut

Pemët

bëhen

si kafshë të lagura

nga ujët e detit

çurg

u kullon

gjithë trupi

Kështu më shkoi jeta

të mbaj larg dashurinë

me të cilën

si shi bie

mbi botën e pranverës,

çurgon

dhe kështu fjalët ndan

deri sa gjen një shteg

për dashurinë e saj.

Përmes rrjedhin

pikat.

Shiu

si mjek dashamirës

shiu i mendimeve të saj

mbi oqean

e ngado

ku kalojnë

me këmbët e shpejta, të padukshme

mbi dallgët e pambrojtura

Dashuri jo e kësaj bote

ku shpresa për botën s’ka

dhe pas dëshirës

s’mund ta ndryshojë

Bie shiu përmbi dhé

mbi bar e mbi lule

Përsosmërisht vjen

në trajtë të lëngët

kthjelltësie

Por dashuria s’është

e kësaj bote

dhe prej saj

asgjë nuk vjen

pos dashuri

që pafundsisht

vazhdon të bjerë

nga mendimet e saj.

Përktheu: Maksim Rakipaj

William Carlos Williams, poet, shkrimtar dhe mjek amerikan, u lind më 17 shtator 1883 në një familje mërgimtarësh portorikanë në New Jersey. Në vitin 1902 u regjistrua në Fakultetin e Mjekësisë në Pensilvania. Kjo qe koha kur u njoh me të madhin Ezra Pound dhe Hilda Doolitle, miqësi që e lidhën me botën e poezisë.